معروف ادیب، صحافی اور ایکٹیوسٹ جنابِ ڈاکٹر سلیم احمد کی شناخت سرکاری حلقوں میں ایک ذمہ دار صحافی کے بطور مستحکم ہے اور وہ ادبی حلقوں میں افسانہ نگار، مرتب اور ماہرِ مطالعاتِ پروفیسر محمود الہی کی حیثیت سے پہچانے جاتے رہے ہیں۔ گزشتہ پانچ سالوں سے آپ سہ ماہی ”ادبی نشیمن“ کے نام سےایک معیاری ادبی رسالہ نکال رہے ہیں اور لکھنؤ کی تابندہ ادبی روایات کی آبیاری کر رہے ہیں جسے پوری اردو دنیا میں لکھنؤ کی نمائندگی کے ایک قابلِ قدر باب کے طور پر دیکھا جا رہا ہے۔ آپ ۱۵/ اپریل ۱۹۶۳ کو گورکھپور میں پیدا ہوئے ۔ ابتدائی تعلیم اپنے والدگرامی مرحوم مبین احمد کی نگرانی میں مکمل کی اور ایم اے و پی ایچ ڈی کی ڈگریاں گورکھپور یونیورسٹی سے امتیازی نمبروں کےساتھ حاصل کی۔ پروفیسر محمود الہی کی خاص نگرانی میں انھوں نے تحقیق و تدوین کے رموز حاصل کیے اور مسابقتی امتحان پاس کرکے حکومت اترپردیش کے محکمہ اطلاعات ورابطہ عامہ میں مترجم ہوکر لکھنؤ کو اپنا مسکن بنالیا۔ اس درمیان صحافتی ذمہ داریوں کی ادائیگی کے ساتھ ساتھ انھوں نے اپنے تحقیقی سفر کو بھی جاری رکھا اور درج ذیل کتابیں منظر عام  پر لانے میں کامیاب رہے
 ۔ اردو کے خطبات آزادی کی  تدوین(تحقیقی  مقالہ)
۔ گورکھپور۔غلامی سے آزادی تک
۔ تحریک آزادی۔کچھ بھولی بسری کڑیاں
۔ رشحات ۔پرو فیسر محمود الہٰی کی ادبی کاوشیں
۔ کلیات ہندی گورکھپوری (ترتیب و تدوین)
۔ نگارشات (پروفیسر محمود الہٰی کے خطوط مشاہیر ادب اور شاگردوں کے نام )
۔ سربراہ ( افسانوی مجموعہ) زیر طبع
ان صحافتی، تحقیقی اور ادبی خدمات کو انجام دیتے ہوئے وہ خدمت خلق سے بھی وابستہ رہے اورتعاون کے جذبے سے سماجی ذمہ داریوں سے عہدہ بر آ ہونے کی کوشش کرتے رہے۔اس کے تحت وہ سڑک کنارے زندگی بسر کرنے والوں میں ہفتہ میں کھانا تقسیم کرنا،جھگی جھوپڑیوں میں وقتاً فوقتاً اناج تقسیم کرنا، ان کے بچوں کے لیے تعلیم کا انتظام وغیرہ،غریب لڑکیوں کی شادی میں دس ہزار روپے تک کی مدد کرنا،رمضان اور عید کٹ تقسیم کرناجیسے کام بغیر کسی تعاون کے نجی طور پرانجام دیتے رہے۔ گزشتہ لاک ڈائون میں کچھ خیرخواہوں کے تعاون سے تقریباً ساڑھے سات لاکھ کا غلہ بھی انھوں نے ضرورت مندوں میں تقسیم کیا ۔ اس ضمن میں لکھنؤ کے معروف شعراء ( بشمول انیس، دبیر ،آتش، ناسخ اور مصحفی) کے مزارات کی تزئین کاری کی ان کی کوششوں کو قدر کی نگاہ سے دیکھا گیا۔ نتیجتاً لکھنؤ کے ادبی و سماجی حلقوں میں اس سلسلے میں مثبت پیش رفت دیکھی گئی اور بقیہ مزارات کی تزئین کاری کے حوالے سے لوگ سنجیدہ ہوئے۔
ڈاکٹر سلیم کی شناخت کا ایک مستحکم حوالہ مطالعاتِ پروفیسر محمود الہی میں ان کی خاص دلچسپی کو سمجھا جاتا ہے۔ پروفیسر محمود الہی معروف ناقد، محقق اور اترپردیش اردو اکادمی کے فعال چیئرمین کی حیثیت سے ایک تاریخی اہمیت کی حامل شخصیت ہیں، جنہوں نے مولانا آزاد کی صحافیانہ کاوشوں کو دستاویزی شکل دے کر الہلال اور البلاغ کو ہمیشہ کے لیے محفوظ کرنے کا کارنامہ انجام دیا تھا۔ ان ہی پروفیسر محمود الہی کی مختلف تحریروں کو ڈاکٹر سلیم احمد نے سنجونے کا سلسلہ جاری رکھا ہے۔ پروفیسر محمود الہی نے مشاہیر کے نام جو خطوط رقم کیے تھے، ان خطوط کو ڈاکٹر سلیم احمد نے بڑی جانفشانی سے جمع کیا اور اترپردیش اردو اکادمی کے مالی تعاون سے اس قیمتی ذخیرے کو ”نگارشات“کے نام سے منظر عام پر لے آیا۔ اس سے قبل انھوں نے پروفیسر محمود الہی کی تحریروں کا ایک مجموعہ” رشحات: پروفیسر محمود الہی کی ادبی کاوشیں“ کے نام سے بھی شائع کرنے کا کارنامہ انجام دیا تھا۔ ادبی نشیمن کی اشاعت کے پانچ سالہ سفر میں انھوں نے انور جلال پوری، محمود الہی، رشید حسن خان، گلزار زتشی دہلوی اور راحت اندوری، شمس الرحمن فاروقی اور فضل امام رضوی جیسی شخصیات پر گوشے اور نمبر شائع کیے اور لاک ڈاؤن میں انتقال کر جانے والے فنکاروں کی خدمات کا اعتراف کرتے ہوئے انھوںنے ایک ضخیم شمارہ ”خراج عقیدت نمبر“ کے نام سے شائع کرایا جس کی ادبی حلقوں میں خوب خوب پذیرائی ہوئی۔