لکھنؤکے ادبی فلک پر بے شمار اخبار و رسائل کی کہکشا ں دیکھنے کو ملتی ہے ۔منشی نول کشور کا ’اودھ اخبار‘جس میںپنڈت رتن ناتھ سرشار کا ناول فسانہ آزاد قسط وار شائع ہوتا تھاجو لکھنؤ کی زوال پذیر تہذیب کا عکاس ہے۔ منشی سجاد حسین کا ہفتہ وار رسالہ’ اودھ پنچ‘ جس کی ہر بڑے شہر کے اہل قلم نے نقل کرنے کی کوشش کی اور اس کی طرز پرلاہور پنچ،آگرہ پنچ،دکن پنچ،بنارس پنچ وغیرہ نہ جانے کتنے شہروں سے پنچ نام کے رسالے نکالے گئے۔اودھ پنچ کا طرہ امتیاز طنز و ظرافت ہے۔اس رسالہ کی کہکشاں کے جھرمٹ میںمنشی سجاد حسین،مرزامحمدمرتضیٰ ستم ظریفؔ،جوالا پرساد برقؔ،منشی احمد علی شوقؔ،اکبرؔ الہ آبادی،پنڈت تربھون ناتھ وغیرہ کے نام نامی قابل ذکر ہیںجنہوں نے منثور و منظوم میں طنزو مزاح کی ست رنگی پھلجڑیاں بکھیری ہیں۔عبدالحلیم شررؔ کا رسالہ’ دلگداز‘اہل ادب کے لئے محتاج تعارف نہیں ہے جو جدید اردو نظم اور تاریخی ناول کے فروغ میںچراغ راہ ثابت ہوا ہے ۔نیاز فتح پوری کا رسالہ’ نگار‘چاردہائی سے زیادہ کے عرصے تک ہند و پاک کے اہل قلم کے لئے مشعل راہ بنا رہا ۔ عبدالماجد دریا آبادی کا رسالہ (۱) سچ اور (۲)صدق، عابد سہیل کا رسالہ’ کتاب‘،ملک زادہ منظور احمد کا رسالہ’ امکان‘ وغیرہ ایک عرصے تک علمی،ادبی،لسانی اور نظریاتی ضو فشاں سے اہل علم و فن کی پیاس بجھاتے رہے اوران کے اذہان و قلوب کو منور کرتے رہے۔ یہ زمانے کے نشیب و فراز میں اپنی ضیاء بکھیر کر گم ہو گئے ۔
رسالوں کی کہکشاں میں جو رسالے ابھی بھی درخشاں و رخشندہ ہیںاور جنہیں سرکاری سرپرستی حاصل ہے ان میں علی جواد زیدی کی ادارت میں 1955 ؁سے شائع ہونے والاماہنامہ’ نیادور‘محکمہ اطلاعا ت و نشریات،حکومت اترپردیش،سہ ماہی ’ اکادمی‘،اترپر دیش اردو اکادمی،لکھنؤ اور ماہنامہ’ خبر نامہ‘ اترپردیش اردو اکادمی ،لکھنؤ کے نام گرامی شامل ہیں۔غیر سرکاری ادارت میں شائع ہونے والے جریدوں میںرشید قریشی کا ماہنامہ ’لاریب‘،محمد حسین شمس علوی کاماہنامہ’ فروغ اردو‘،ثریا ہاشمی کا دو ماہی رسالہ’ گلبن‘، ڈاکٹرسلیم احمد کا سہ ماہی رسالہ ’ادبی نشیمن‘وغیرہ لکھنؤکے ادبی فلک پر رسالوں کی قندیلیں روشن کئے ہوئے ہیںاور سماجی،علمی،ادبی،لسانی،فکری، نظریاتی واسلوبیاتی ضیاء سے قصر ادب اردو کے مختلف گوشوں کو منور کر رہے ہیں۔عہد حاضر کے رسالوں میں جس رسالہ کی ضو فشاںاہل علم و ہنر کوسب سے زیادہ توانائی وتازگی بخش رہی ہے،جس کی ادبی شہرت و مقبولیت کا پھریرا چہار سو لہرا رہا ہے اس رسالہ کا نام ’ادبی نشیمن ‘ ہے۔’ادبی نشیمن ‘کے رسم اجرا کے موقع پر ’اودھ نامہ‘ اخبار کے نامہ نگار اور کالم نویس موسی رضاجواس وقت وہاں موجود تھے،پانچ سال بعد6 مارچ 1922 ء کو اپنے مضمون ’اردو صحافت کا نمائندہ :سہ ماہی ادبی نشیمن لکھنؤ‘کے متعلق اپنے نیک خیالات وخواہشات کا اظہار کرتے ہوئے رقمطراز ہیں :
’’ڈاکٹر سلیم احمدنے ڈاکٹر محمود الٰہی صاحب کی علمی و ادبی وراثت کواپنے کاندھوں پر اٹھاکرپانچ سال قبل یعنی دسمبر2017میںادبی نشیمن کے نام سے ایک نیاچراغ روشن کیا تھا۔اس رسالہ کا اجراء پروفیسر شارب رودولوی کے بنا کردہ شعاع فاطمہ گرلز انٹر کالج میں ہوا تھا اور اس پروگرام میں رسالہ کے اغراض و مقاصد بیان کئے گئے تھے۔میں بھی شریک پروگرام تھااور مجھے خوشی ہے کہ جس جوش و جذبہ کے ساتھ ر سالے نے خدمت ادب کا خواب سنجویا تھاوہ شرمندہ تعبیر ہوتا نظر آرہا ہے۔ اس قلیل مدت میںجس طرح اس رسالے نے سورج بننے کے سفر کوطے کیا اور اپنا ایک خاص معیار بنایا ہے،وہ قابل تعریف ہے۔مختلف النوع مشمولات کے سبب بزرگ اور نو آموز قلمکاروں کی توجہ اس رسالے کو یکساں طور پر مل رہی ہے۔پانچ سال کے بیس شماروںمیں اس رسالے نے بیشتر ایسے موضوعات کو روشن کیا ہے جس کی طرف عام مدیران کی توجہ کم جاتی ہے۔بیشک یہ ڈاکٹر سلیم احمد اور ان کی ٹیم کی کاوشوں کا ثمرہ ہے جو نہ صرف رسالے کی باریکیوں پر نظر رکھتی ہے بلکہ ہر مضمون کو لفطاً لفظاً پڑھ کروقت ضرورت اصلاح بھی کرتی ہے۔اس طرح یہ جریدہ اردو کے چند معیاری رسالوں میںاپنی منفرد حیثیت بنانے میں کامیاب رہا۔‘‘
(حوالہ۔1،ص۔5،روزنامہ، اودھ نامہ ،مارچ 2022؁ء (
اترپردیش کے گورنر جناب رام نائیک جو اردو زبان سے دلچسپی رکھتے ہیں، اس بات کا ثبوت ان کی مراٹھی زبان میںلکھی گئی کتاب ’چرے وتی چرے وتی ‘کا اردو زبان میں ترجمہ ہے۔انہوں نے اس جریدہ کی پہلی اشاعت پرایک پیغام دیا ہے جس میں اردو زبان و ادب کے استحکام اور اس کے قارئین کے اضافہ کی امید ظاہر کی ہے ۔ایڈیٹر ڈاکٹر سلیم احمد نے اپنے ادبی مشیررفعت عزمی اور نیا دور کے سابق ایڈیٹروضاحت حسین رضوی کے ہمراہ رسالہ کا پہلا شمارہ گورنر رام نائیک کو پیش کیا۔ادبی نشیمن کے مارچ تا مئی 2018؁ کے شمارہ کے آخری صفحہ پر پہلے شمارہ کے رسم اجرا کی دیدہ زیب تصویر ہے جس میں پروفیسر شارب رودولوی،مرزا شفیق حسین شفق، ڈاکٹر سلیم احمد،رفعت عزمی اور غفران نسیم وغیرہ کو دیکھا جا سکتا ہے اور اس کی سرکاری سرپرستی وتاریخی دستاویز کی اہمیت کو بخوبی سمجھا جا سکتا ہے۔گورنر اترپردیش رام نائیک کا پیغام پیش خدمت ہے:
’’خوشی کی بات یہ ہے کہ لکھنؤ سے اردو کا ایک سہ ماہی رسالہ’ادبی نشیمن‘منظر عام پر آرہا ہے۔اردو گنگا جمنی تہذیب کی ایک نمائندہ زبان ہے۔امیدہے کہ ’ادبی نشیمن‘کی اشاعت سے اردو کو فائدہ پہنچے گا اور اس کے قارئین کے دائرے میں مزید اضافہ ہوگا۔’ادبی نشیمن‘کی کامیابی کے لئے میری نیک خواہشات۔‘‘
(حوالہ۔2 ،سہ ماہی ادبی نشیمن دسمبر2017 ؁تا2018؁)
رسالہ ’ادبی نشیمن‘کے اب تک کل 20 شمارے شائع ہوچکے ہیں اور شائقین ادب سے داد و تحسین حاصل کر رہے ہیں۔اس رسالہ کے مشمولات میں تمام اصناف سخن (منثور و منظوم )شامل ہیں۔پہلے شمارے سے ہی اس کی علمی و ادبی اہمیت اور اس کی قدر و منزلت کا اندازہ لگایا جا سکتا ہے۔اس کے ہر شمارے کی تحریروں سے پتہ چلتا ہے کہ اس میں بزرگ قلمکاروں کے ساتھ ہی ساتھ نو آموز فنکاروںکو محمود و ایاز کی طرح ایک ہی صف میں کھڑا دیکھا جا سکتا ہے۔یہ اس بات کی دلیل ہے کہ یہ رسالہ بلا تفریق مذہب و ملت نسل نو کی آبیاری ادبی بصیرت کے ساتھ کر رہا ہے۔اس رسالے نے ادبی شخصیات کے کئی خصوصی نمبر(انور جلال پوری نمبر،محمود الٰہی نمبر) اور خصوصی گوشے (رشید حسن خان ،فضل امام رضوی ، شمس الرحمٰن فاروقی،ظفر احمد صدیقی،گلزار دہلوی اور راحت اندوری)اور خراج عقیدت نمبر(فضل امام رضوی،شمیم حنفی،ابولکلام قاسمی،مولا بخش،عنبر بہرائچی،شوکت حیات،افتخار امام صدیقی وغیرہ)زیب قرطاس کئے ہیں۔یہ تمام خصوصی نمبر اور گوشے اردو کے ان آفتاب و ماہتاب کے مانندہیںجو نسل نو خاص کر ریسرچ اسکالرز کے لئے مشعل راہ ثابت ہو ںگے ۔ اس جریدے میںادباء و شعراء نے انور جلال پوری،پروفیسر محمود الٰہی،رشید حسن خان،شمس الرحمٰن فاروقی وغیرہ کی شخصیت کے گوناگوں پہلوؤں کو صفحہ قرطاس پر بکھیرنے کی کامیاب کوشش کی ہے۔کسی نے انور جلال پوری کومسجع جملوں کا فنکار، سماج کو سبق پڑھانے والا قلمکار،تو کسی نے اردو ادب کا شہسوار اور کسی نے ادب کی مجسم تصویر کے عناوین سے سرفراز کیا ہے۔کسی نے پروفیسر محمود الٰہی کوادبی سومنات کا محمود،اردو تحقیق کی آبرو محمود الٰہی،پروفیسر محمود الٰہی کی طنزیہ تحریریں،تو کسی نے میرے کتابی استاد کی شہ سرخی سے سر بلند کیا ہے۔کسی نے گلزار دہلویؔ کو دبستان دہلی کا آخری سخنور:گلزار دہلوی،گنگا جمنی تہذیب کا حسین سنگم:گلزار دہلوی عناوین سے تو کسی نے راحت اندوری کو عوامی اقدارو احساسات کے انقلابی شاعر:ڈاکٹر راحت اندوری،حق گوئی و بے باکی کا نقیب:راحت اندوری کے عناوین سے گلہائے عقیدت پیش کیا ہے۔اسی طرح رشید حسن خان،ظفر احمد صدیقی اور دیگر شخصیات کے عناوین کی فہرست کافی طویل ہے۔ان عناوین کے قلمکاروں میں کہنہ مشق شاعر و ادیب کے علاوہ نئے نئے فنکاروں نے قلم فرسائی کی ہے جس میں دبستان لکھنؤ کی لسانی خصوصیات کو صاف طور پردیکھا جا سکتا ہے ۔اس سلسلے میں پروفیسر محمود الٰہی خصوصی نمبر کے ایک عنوان ’کون جیتا ہے تیری زلف کے سر ہونے تک ‘سے ایک اقتباس ملاحظہ ہو جس سے ان کی علمی ،ادبی،تحقیقی وتنقیدی پہلوؤں سے بصیرت حاصل کی جا سکتی ہے :
’’فسانہ عجائب کا بنیادی متن،نکات الشعراء،تذکرہ شورش،اردو کا پہلا ناول ۔خط تقدیرہو یا پھر ان کا تحقیقی مقالہ’اردو قصیدہ نگارہی کا تنقیدی جائزہ‘یہ ان کے وہ تحقیقی اثاثہ ہیںجس کی بنیادپر انھیںادب میں معتبرمحقق اور نقادکی حیثیت حاصل ہے۔مولاناابولکلام آزادکے اخبار’ الہلال‘اور ’البلاغ‘کو تلاش کر تحقیقی مقدمے کے ساتھ مرتب کرنا،انشاء پردازمہدی افادی کے خطوط کے مجموعہ’صحیفہ محبت‘کو بھلا کیسے بھلا سکتے ہیںجبکہ ’بازیافت‘ ان کے تحقیقی اور تنقیدی مضامین کا پہلا مجموعہ ہے جس میں کل دس مضامین شامل ہیں۔اسی میں اردو ڈرامہ اور انار کلی کے عنوان سے شامل مضمون میں جو تجزیہ موصوف نے پیش کیا ہے۔ اسے اب تک اردو تنقید کا حرف آخر مانا جاتا ہے جبکہ باقی مضامین ان کی تحقیقی ،تنقیدی،علمی، صلاحیت کو اجاگر کرتی ہیں جو یقیناً اردو ادب میں قدر کی نگاہ سے دیکھے جانے والے دستاویز ہیں۔‘‘
(حوالہ۔3 ص۔ 4 ادبی نشیمن۔مارچ تا مئی 2019 ؁)
اسی طرح سے ناظم مشاعرہ ، شاعراور کئی نگارشات کے خالق انورجلال پوری کو جن لوگوں نے اپنی تحریروں کے ذریعہ نذرانہ عقیدت پیش کیا ہے ان میں سے ایک مشہور شاعر و ادیب اوران کے کلام موزوںکے ہمراہی سنجے مصرا شوقؔہیں۔سنجے مصرا شوق ؔنے اپنے مضمون ’اردو شاعری میں گیتا‘میں ان کی شخصیت اور زندگی کے نشیب وفرازکو اس طرح سے اجاگر کیا ہے:
’’پامال راہوں پر چلنے والے،چھوٹے چھوٹے راہوں میں مقید رہ کر ہی مست مگن رہتے ہیں۔جبکہ نکیلے پتھروں پر دیوانہ وار چل کر تلوؤں سے رسنے والے لہو کی فکر نہ کر نے والے ہی کسی بڑے دائرے کو جنم دے پاتے ہیں۔انور جلال پوری ایک ایسے دانشور ہیںجو علاقائی اور لسانی دائروں سے نکل کر،دل کی آواز پر بے خوف و خطر لکھتے ہیںاور بہت خوب لکھتے ہیں۔جس موضوع پر قلم اٹھاتے ہیںاس کا حق ادا کرتے ہیں۔نفرت،تعصب اورتنگ نظری کی ہر دیوار کووہ عزم و حوصلہ کی ٹھوکر سے منہدم کردینے کا جذبہ رکھتے ہیں۔مختلف تہذیبوں اور زبانوں کا انھیں گیان ہے۔نظامت کے حوالہ سے دنیا کے مختلف ترقی یافتہ ممالک کا سفر طے کر چکے ہیں۔درس وتدریس سے طویل عرصہ تک تعلق کے سبب نسلوں کی آبیاری کا انھیں تجربہ ہے۔ قوموں کے عروج وزوال پر ان کی گہری نظر ہے۔‘‘
(حوالہ۔4 ص۔16 ادبی نشیمن ،مارچ تا مئی 2018 ؁ (
رسالہ کے ایڈیٹر ڈاکٹر سلیم احمد اردو کے ادیب،افسانہ نگار،نقاد اور معتبرصحافی کے طور پر ادبی حلقوں میں اپنی شناخت قائم کر چکے ہیں۔فی الحال وہ اترپردیش کے محکمہ اطلاعات و نشریات میں اپنی خدمات کو بحسن و خوبی انجام دے رہے ہیں۔وہ برابر اخبارات و رسائل کی زینت بنتے رہتے ہیںاور مختلف موضوعات ومسائل پراپنے خیالات و نظریات کو جنبش قلم کرتے رہتے ہیں،جس کی علمی اور ادبی حلقوں میں برابر پذیرائی ہوتی رہتی ہے۔انہوںنے اپنے اداریوں کے توسط سے ہندوستانی سماج،ادب، سیاست و حکومت کو آئینہ دکھانے اورعوام کو اس کی ذمہ دارویوں کا احساس دلانے کے لئے جس حوصلہ،ہمت اور بیباکی سے ہمہ وقت قلم فرسائی کرتے رہتے ہیں یہ انھیں کے بس کی بات ہے ۔ دیگر رسالوں کے اداریوں میں اس طرح کے بے باک انداز بیان کا فقدان دکھائی دیتا ہے۔ان کے اداریوں میں ایک طرح کا نشتر ہوتا ہے جو ناسور بن چکے مسائل کا آپریشن کرنا چاہتا ہے تا کہ اس کو جلد از جلد ختم کیا جا سکے۔ ایک اقتباس دیکھئے:
’’اترپردیش میں اردو کو دوسری سرکاری زبان کا درجہ ملے 29 برس کا عرصہ گزر چکا ہے مگر آج تک یہ زبان نافذ ہونے سے محروم رہی حالانکہ اس دوران سازگار حکومتیں بھی آئیںمگر تب’’ہمیں سو گئے داستاں کہتے کہتے‘‘،اب تو حالات بد سے بد تر ہوتے جا رہے ہیں جس کی اصل وجہ حکومت کی تنگ نظری اور فرقہ پرست ذہنیت ہے۔صرف اور صرف یہ ہے کہ اس زبان کو ایک خاص طبقہ یعنی اقلیتوں سے جوڑ کر مذہب کا لبادہ پہنا دیا گیا ہے۔،تقسیم ہند کے بعدسے ہی یہ زبان تعصب کی بنا پر اپنی جائے پیدائش میںفرقہ پرستانہ،تنگ نظری،اجنبیت اورسرد لہری کا شکار ہو گئی اور تبھی سے یہ اپنی بقا اور ترویج وترقی کے لئے جدو جہد کر رہی ہے۔اردو زبان میں ملازمت کرنے کے دروازے بند کرنے کے راستے ہموار کئے جا رہے ہیں اور ہم ہیں کہ اب بھی سوئے ہوئے ہیں۔‘‘
(حوالہ۔ 3 ،ص ۔2،ادبی نشیمن ،مارچ تا مئی 2018 ؁ (
کروناکی دوسری خطرناک لہر میں انسانی جانوں کا زیاں جس تیزی کے ساتھ ہو رہا تھا۔آکسیجن اور ضروری ادویات کی جمع خوری اور لوٹ گھسوٹ سے لاکھوں لوگ لقمہ اجل بن رہے تھے۔قبرستانوں اور شمشان کھاٹوں پر لاشوں کے انبار لگے تھے۔ گنگا میں بہتی لاشیں اور اس کے گھاٹ مردوں کی مرتیو شییا (موت کا بستر)بنے ہوئے تھے۔ ہر طرف قیامت صغریٰ برپا تھی۔ارباب حکومت اور سیاست اس مصیبت کی گھڑی میں خاموش تماشائی بنے ہوئے تھے۔ ایسے میں ادیبوںکا فرض بنتا ہے کہ وہ ارباب اقتدار کو اپنی تحریروں کے ذریعہ حقیقت کا آئینہ دکھائے۔ اس کام کو ڈاکٹر سلیم احمدنے اپنے اداریہ میں بخوبی انجام دیا ہے۔:
’’کرونا کی دوسری لہربے حد خطرناک طریقہ سے ملک میں داخل ہوئی اور اپنا قہر بے حد تیزی کے ساتھ بکھیرنے لگی اور پھر شروع ہو گیا مریضوں اور اموات کی طویل ہوتی فہرست کا سلسلہ۔جیسے جیسے مریضوں کی تعداد میں اضافہ ہوتا گیا ویسے ویسے طبی مسائل کھڑے ہوتے گئے۔اپریل کے آخر تک تو آکسیجن کی قلت سے پورے ملک میں افراتفریح مچ گئی۔عوام آکسیجن کے بغیر تڑپ تڑپ کر مرتے رہے اور لوگ اپنے عزیز و اقارب، ماں،باپ،بھائی ،بہن کو اپنی آنکھوں کے سامنے آکسیجن نہ مل پانے کی وجہ سے مرتے ہوئے دیکھتے رہے مگر وہ بے بس اور مجبور تھے۔ملک کا تیسرا اور چوتھا ستون بے حسی میں مبتلا رہا۔ایسے میں ملک کے پہلے ستون کو کہنا پڑا کہ’حکومت چاہے بھیک مانگے لیکن ریاستوں کی آکسیجن کی طلب کو پورا کرے۔‘تب تک انسانی جانوں کے سوداگروں کا کھیل بھی شروع ہو گیا تھا۔آکسیجن اور انجیکشن کی بڑے پیمانے پر کالا بازاری اور نرسنگ ہوم کی قزاقی نے متوسط طبقہ کے عوام کی کمر توڑ دی۔بہرحال اس دوسری لہر سے اردو کو جو جانی ادبی نقصان ہوا وہ اردو ادب کی تاریخ میں اب تک کا سب سے بدترین دور تھا۔ایک کے بعد ایک اردو ادب کی عظیم شخصیتوں کا اتنی بڑی تعداد میںدنیا سے رخصت ہونا یقیناًتاریخ اردو ادب کابہت بڑا خسارہ ہے۔‘‘
(حوالہ 5 ،ص۔4 ،ادبی نشیمن ،ستمبر تا نومبر 2021 ؁ (
سہ ماہی رسالہ’ ادبی نشیمن‘ کے مجموعی شماروں پر جب ادب کے پارکھی تنقیدی و تحقیقی نظر ڈالتے ہیں تو اس میں کچھ کمیاں اور خامیاں بھی دیکھنے کو ملتی ہیں۔جب ہم اس رسالہ کے پہلے شمارہ کا تحقیقی نقطہ نظر سے مطالعہ کرتے ہیں تو دیکھتے ہیں کہ اس کے انگریزی نام دو طرح سے ملتے ہیںپہلاAdabi Nasheman) ) اور دوسرا (Adbee Nasheman) ۔اس سلسلے میںجب رسالہ کے ایڈیٹر ڈاکٹر سلیم صاحب سے اس کے متعلق دریافت کیا تو انھوں نے اس خامی کو تسلیم کیا۔انھوں نے بتا یا کہ’ ادبی نشیمن ‘کا رجسٹریشن Adbee Nasheman کے نام سے ہوا ہے جبکہ یہ لفظ درست نہیں ہے۔اس کا صحیح املا Ababi Nasheman ہے ۔ان کا کہنا ہے کہ ان کے ادبی مشیر رفعت عزمی کے علاوہ دیگر حضرات نے ان کی توجہ اس جانب مبذول کرائی ہے اس کو درست کرانے کی کوشش جاری ہے اور رجسٹریشن کی اس خامی کو جلد از جلد درست کر لیا جا ئے گا۔علاوہ ازیںرسالہ کے پہلے اور دوسرے شمارے میںمجلس ادارت کا ذکر نہیںملتا ہے،تیسرے شمارہ میںپانچ حضرات کے نام مجلس ادارت میں دیکھنے کو ملتے ہیں۔2022 ؁ میں مجلس ادارت کے ارکان کی تعداد چھ ہو جاتی ہے۔یہ ان کے رسالے کی ریویو پالیسی کو مستحکم بنانے میں ان کی معاونت کرتے ہیں اور ایسا محسوس ہوتا ہے کہ یہ مختلف دبستانوں کی نمائندگی کر رہے ہیں۔مجلس ادارت کے تمامی حضرات کہنہ مشق اور تجربہ کار ،کئی کئی کتابوں کے تخلیق کار اورمختلف اصناف پر دسترس رکھتے ہیں ۔لیکن میری ناقص رائے میں مجلس کے اراکین کا پلڑا کلام موزوں کے مقابلہ کلام غیر موزوں میںبھاری دکھائی دیتا ہے اور ڈاکٹر سلیم احمد صاحب کو غور وفکر کی دعوت دیتا ہے کہ رسالہ کے منظوم و منثور حصوں کے توازن کو برقرار رکھا جائے۔
کسی بھی جریدے کی قدر وقیمت کا فیصلہ اس کے قارئین کے ہاتھ میں ہوتا ہے ۔قارئین کے ردعمل(فیڈ بیک)ان کے خطوط کے توسط سے ایڈیٹر کو دستیاب ہوتے ہیں جس میں وہ رسالہ کی کمیوں اور خوبیوں پر اپنے ردعمل کا کھل کر اظہار کرتے ہیں۔رسالہ کا مدیروقت کا نباض ہوتا ہے اور اپنے قارئین کے بتائے گئے راستے ، سجھائے گئے طریقے اور نیک مشورے کا پاس و لحاظ بھی رکھنا پڑتا ہے۔ ان میںسے کچھ خطوط تعریفی،تخریبی اور تنقیدی بھی ہوتے ہیںجو رسالہ کے لئے مستقبل کی کامیابی کی راہ کے ضامن ہوتے ہیں۔رسالے کے مدیریا ایڈیٹر کو کو قارئین کی طرف سے برابر خطوط موصول ہو تے رہتے ہیں ۔ایسا ہی ایک خط خواجہ معین الدین چشتی لینگویج یونیورسٹی لکھنؤکی ریسرچ اسکالر عافیہ حمید نے لکھا ہے جو آپ کی توجہ کا طالب ہے ،ملاحظہ ہو:
’’شکر ہے آج لکھنؤ سے بہت سے ادبی رسائل شائع ہو رہے ہیں۔ہر رسالے کی اپنی انفرادی خصوصیات ہیںاور وہ اپنی انفرادیت کی بنا پرادبی دنیا میں متعارف بھی ہیںاور مخصوص شناخت کا حامل بھی۔ادبی نشیمن بھی لکھنؤ سے ہی شائع ہونے والاایک علمی و ادبی رسالہ ہے۔جو نہ صرف ایک ادبی رسالہ ہے بلکہ اس کے ساتھ ساتھ ایک انجمن کی شان بھی رکھتاہے۔یہ رسالہ ڈاکٹر سلیم احمد صاحب کی ادارت میں ہر تین ماہ پر پابندی کے ساتھ منظر عام پر آتاہے اور علمی تشنگی بجھانے کا سبب بنتا ہے۔اس وقت دسمبر تا فروری 2022 ؁کا شمارہ میرے پیش نظر ہے۔اس کے ہر صفحے کو ادبی گل بوٹے سے آراستہ کیا گیا ہے مگر جو بات دل کو خوش کرتی ہے وہ یہ ہے کہ رسالے کا اپنا ایک متعین معیار ہے۔اس میں شائع تمام تحریریںپختہ اور معیاری ہیں۔اس کے ساتھ ہی اس میں نئے لکھنے والوں کوفراخدلی کے ساتھ جگہ دی جاتی ہے اور خاطر خواہ اصلاح بھی کی جاتی ہے تاکہ مضمون معیاری بن سکے۔خوشی اس بات کو دیکھ کر بھی ہوتی ہے کہ اس رسالے میں تمام اصناف سخن کا خیر مقدم کیا جاتا ہے۔یہی وجہ ہے کہ ادبی نشیمن نے اپنی تمام خصوصیات کے دم پربہت جلد ادبی دنیا میں مقبولیت حاصل کر لی ہے۔بلا شبہ اس طرح کے کام میںبے حد محنت،وقت اور توجہ درکار ہوتا ہے اور ساتھ ہی بہت سی مشکلات کا سامنا بھی کرنا پڑتا ہے۔اس کے باوجود رسالہ پابندی کے ساتھ نکل رہا ہے،یہ نیک فال ہے اور اس کا سارا کریڈٹ مدیر محترم اور ان کے معاونین کو جاتا ہے۔جنکی کوششوں کی بدولت رسالہ ادبی افق پر روشنی بکھیرنے میں کامیاب نظر آرہا ہے۔
ادبی نشیمن جہاں نثری صلاحیتوں کو نکھارنے کا ایک بہترین پلیٹ فارم ہے۔ وہیںاس نے ذوق شاعری کو جلا بخشنے میں کوئی کسرچھوڑ نہیں رکھی ہے۔خوشی ہے کہ اس شمارے میں چھ خوبصورت غزلوں کو جگہ ملی ہے۔اس کے ساتھ ہی دو عمدہ کتابوں پربہترین تبصرے شامل ہیں۔بے شک یہ نہایت مدلل اور مبسوط تبصرے ہیںاور اردو کے طلبہ کے لئے ان کتابوں کو سمجھنے میں رہنما ثابت ہوں گے۔رسالہ سلیم صاحب کے اداریہ سے شروع ہو کر دستاویزکے معلوماتی صفحات پر ختم ہوتا ہے۔ساتھ ہی ڈاکٹر شمیم نکہت ایوارڈ فکشن کے پر وقار منظر کے عکس کو بھی محفوظ کیا گیا ہے۔اپنے عہد کی تاریخ کو سمیٹنے کی یہ کوشش متاثر کن اور قابل داد بھی ہے۔ادبی نشیمن کے مدیراور تمام معاونین کو اس خوبصورت رسالے کی اشاعت پردل سے مبارک باد اور دعائیں۔‘‘
( حوالہ۔ 6،ص۔5،روزنامہ ،اودھ نامہ ،مارچ 2022؁ء (
موجودہ دور میںلکھنؤ کے ادبی وصحافتی فلک کا درخشاںستارہ سہ ماہی رسالہ ’ادبی نشیمن ‘ ہے جو اپنی روشنی ہر سمت پھیلا رہا ہے۔ علمی و ادبی حلقوں میںاس کا دائرہ روز بروز بڑھتا جا رہا ہے جس سے اس کی شہرت و مقبولیت میںبھی اضافہ ہوتا جا رہا ہے۔یہ رسالہ نئے نئے خیالات ونظریات کے ساتھ ہی ساتھ نئے و پرانے لکھنے والوں کے لئے دہلیز بنا ہواہے،جہاں مختلف دبستابوں سے تعلق رکھنے والے صاحب قلم سر جھکاتے ہیںاورعلمی و ادبی سکون حاصل کرتے ہیں۔ اس رسالہ کی مجلس ادارت میں جن صاحب قلم کو شامل کیا گیا ہے وہ سب کے سب بہت ہی تجربہ کا اورلائق و فائق حضرات ہیں۔ مجلس ادارت میں شامل حضرات رسالہ میںشائع ہونے والے مضامین کوشائع کرنے سے پہلے اس کا ریویو کرتے ہیں اور اس کے بعد ان مضامین کو شائع کرنے کی اجازت دیتے ہیں۔وہ اس مشکل طلب کام میں رسالہ کے ایڈیٹر ڈاکٹر سلیم احمد صاحب کی پوری محنت اور ایمانداری کے ساتھ مدد کرتے ہیں۔اس رسالہ میںشائع ہونے والے مضامین کی تحریریں پختہ اور دلکش ہوتی ہیں اور قارئین کو اپنی گرفت میں لے لیتی ہیں۔تمام اصناف سخن کو خوش آمدید کہا جاتا ہے ۔یہی وجہ ہے کہ اس رسالہ کا معیار دن بہ دن ترقی کی راہ پر تیزی کے ساتھ گامزن ہوتا جا رہا ہے اور اس کے روشن مستقبل کا ضامن ہے۔آخر میں میں اپنی بات کو نور شمع نورؔکی نظم ’اجالے کی لکیر‘کے ان اشعار پر ختم کرتا ہوں:
وقت کی گرد چھٹے گی تو بعنوان سحر
منزل شوق کی راہوں کا تعین ہوگا
اک نئے دور کی تعمیر کرینگے ہم سب
چاند تاروں سے سجا اپنا نشیمن ہوگا
(یعنی رسالہ سہ ماہی ادبی نشیمن)

کتابیات:
حوالہ ۔1،ص۔5،روزنامہ ،اودھ نامہ ،6مارچ 2022؁ء لکھنؤ
حوالہ۔2 ،سہ ماہی ادبی نشیمن دسمبر2017 ؁تا2018؁لکھنؤ
حوالہ۔3 ص۔ 4 ادبی نشیمن۔مارچ تا مئی 2019 ؁ لکھنؤ
حوالہ۔4 ص۔16 ادبی نشیمن ،مارچ تا مئی 2018 ؁ لکھنؤ
حوالہ 5 ،ص۔4 ،ادبی نشیمن ،ستمبر تا نومبر 2021 ؁ لکھنؤ
حوالہ۔ 6،ص۔5،روزنامہ ،اودھ نامہ ،6مارچ 2022؁ء
حوالہ 7-، نور شمع نورؔکی نظم ’اجالے کی لکیر ،ریختہ ڈاٹ کام

ڈاکٹر وصی احمد اعظم انصاری
(اسسٹنٹ پروفیسر، شعبہ ٔ اردو، خواجہ معین الدین چشتی لینگویج یونیورسٹی، لکھنؤ)